14 ஆண்டுகளுக்கு முன்னர் திருட்டு போன நபரின் Purse! மீண்டும் கிடைத்த ஆச்சரியம்.. உள்ளே என்ன இருந்தது தெரியுமா?

Report Print Raju Raju in தெற்காசியா

இந்தியாவில் இரயில் பயணத்தின் போது தொலைந்து போன பர்ஸ் 14 ஆண்டுகளுக்கு பிறகு திரும்ப கிடைத்த ஆச்சரியம் சம்பவம் அரங்கேறியுள்ளது.

நம்முடைய மொபைல் போனோ, பர்ஸோ, வேறு ஏதாவது பொருட்களையோ தொலைத்துவிட்டால் எப்படியும் திரும்ப கிடைத்துவிடும் என்ற நம்பிக்கை இருக்கும். இதற்காகவே காவல் நிலையங்களில் புகார் அளிக்கப்படுகிறது. இதையடுத்து சில நாட்களோ, சில மாதங்களோ, சில ஆண்டுகளோ காத்திருக்கலாம்.

ஆனால் 14 ஆண்டுகள் முன்னர் காணாமல் போன பொருள் திரும்ப கிடைத்த ஆச்சரிய சம்பவம் மும்பையில் நடந்துள்ளது.

மும்பை நகரைச் சேர்ந்த ஹேமந்த் படல்கர் (42) என்ற நபர் கடந்த 2006ஆம் ஆண்டு சத்ரபதி சிவாஜி ரயில் நிலையத்தில் இருந்து பன்வெல் லோக்கல் நிலையத்திற்கு புறநகர் ரயிலில் பயணித்துள்ளார்.

அப்போது வாஷி ரயில் நிலையம் அருகே செல்லும் போது தனது பர்ஸ் காணாமல் போனதை உணர்ந்தார். பர்ஸில் ரூ.900 ரொக்கம் இருந்துள்ளது. அதில் ஒரு ரூ.500 நோட்டும் அடங்கும். உடனே வாஷி இரயில்வே பொலிசில் புகார் பதிவு செய்துள்ளார். இதையடுத்து சில மாதங்கள் வரை தனது பர்ஸ் குறித்து பொலிசாரிடம் தொடர்ந்து கேட்டு வந்துள்ளார்.

அதன்பிறகு அதை மறந்துவிட்டார். இந்நிலையில் கடந்த ஏப்ரல் மாதம் வாஷி ரயில்வே பொலிசாரிடம் இருந்து ஹேமந்திற்கு தொலைபேசி அழைப்பு வந்துள்ளது. உங்கள் காணாமல் போன பர்ஸ் கிடைத்துவிட்டது. உடனே வந்து வாங்கிக் கொள்ளுங்கள் என்று. இதைக் கேட்டு அவர் ஆச்சரியமடைந்துள்ளார். ஊரடங்கு உத்தரவு காரணமாக அவரால் உடனே காவல் நிலையம் செல்ல முடியவில்லை.

இந்நிலையில் கடந்த வாரம் வாஷி காவல் நிலையத்திற்கு சென்றுள்ளார். அப்போது காணாமல் போன பர்ஸை பொலிசார் கொடுத்துள்ளனர்.

பர்ஸில் இருந்த ரூ.100, ரூ.500 நோட்டுகள் அனைத்தும் பழைய ரூபாய் நோட்டுகள் என்பது தான் வேதனையான விடயம்.

இது குறித்து பொலிசார் கூறுகையில், காணாமல் போன பர்ஸை சமீபத்தில் தான் திருடன் ஒருவனிடம் இருந்து கைப்பற்றினோம். அவனிடம் இருந்து ஒரு டஜன் ரூ.500 நோட்டுகளை பறிமுதல் செய்தோம். அவை அனைத்தும் பழைய ரூபாய் நோட்டுக்கள். இதனால் ஹேமந்த் தொலைத்த தொகையை திருப்பி கொடுப்பதில் சிக்கல் ஏற்பட்டுள்ளது. இவற்றை மாற்றித் தர வேண்டும் என்று ரிசர்வ் வங்கிக்கு கோரிக்கை வைத்துள்ளோம் என கூறியுள்ளனர்.

மேலும் தெற்காசியா செய்திகளைப் படிக்க இங்கே அழுத்தவும்